کس نے چرا لیا ہے مرا دل زہے نصیب

[ismail ajaz]

یہ کلام ۱۹ اکتوبر ۲۰۲۳ میں لکھا گیا تھا
قارئین کرام ایک تازہ کلام کے ساتھ خیالؔ کا آداب ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔
تکمیل ہو سفر دمِ کامل زہے نصیب
ہر ایک کو نصیب ہو منزِل زہے نصیب

سج دھج گئی ہے آج تو محفل زہے نصیب
کس نے چرا لیا ہے مرا دل زہے نصیب

اپنی خوشی میں آپ ہمیں بھول جائیے
غم میں کبھی تو کیجیے شامل زہے نصیب

کیا خوب مسکرا کے ہمیں آپ ہیں ملے
پھول الفتوں کے دل میں گئے کِھل زہے نصیب

چھپنے لگا ہے چاند سا چہرہ پسِ نقاب
چلمن کی دلنشین ہے جِھلمِل زہے نصیب

دل چھوٹا کیجیے نہیں حضرت سخن شناس
رہیے نہ آپ ہم سے یوں بد دل زہے نصیب

شکوے شکایتوں سے نہ حل ہوں گے مسئلے
جس پر ہمارے لب ہیں گئے سِل زہے نصیب

زلفوں کے ناگ، نین نشیلے ، نظر کے تیر
اس پر گلابی گال لیے تِل زہے نصیب

ہم پر توجہ آپ کی اور پھر عنایتیں
سمجھا ہے ہم کو پیار کے قابل زہے نصیب

ایسی اداؤں سے ہمیں مارا گیا خیالؔ
جل کے بغیر جیسے ہو بِسمِل زہے نصیب
۔۔۔۔۔۔۔۔۔۔۔۔۔۔۔۔۔۔۔۔
توجہ کا طلبگار
اسماعیل اعجاز خیالؔ