sabaq_aamoz ash'aar likhiiye

Post by **Hashmat Usmani** » Mon May 30, 2005 10:47 pm

salaam dosto,

ab waqt aa gaya hai ki ham sabaq_aamoz ash'aar qalam_band karne ka silsila shur'u kareN...to she'r 'arz hai:

phool kii patti se kaT sakte hai heere kaa jigar
mard e naadaaN par kalaam e narm o naazuk be_asar

'allaamah Iqbaal

Post by **najma** » Tue May 31, 2005 12:22 am

baiTho gay gar aag ke paas jaa kar
uThogay tum ik roz kapRe jala kar
ye manaa keh kapRe bachaatee rahay tum
magar seNk to roz khaate rahay tum

Post by **Anmol** » Tue May 31, 2005 10:16 pm

Adaab,

Aaj pehli bar is forum meiN ayi huN, acha silsila hay. Aik sawaal kar sakti huN? kya sabaq'amooz ashaar apne zaati bhi ho sakte heN?

Lijiye meri taraf se sher,

Baatin meiN ubhar, kar zabt-e-fugaaN, le apni nazar se kaar-e-zabaaN
Dil josh meiN laa, faryaad na kar, taaseer dikhaa, taqreer na kar

(Akbar Allahabadi)

Post by **najma** » Tue May 31, 2005 10:48 pm

Anmol wrote:Adaab,

Aaj pehli bar is forum meiN ayi huN, acha silsila hay. Aik sawaal kar sakti huN? kya sabaq'amooz ashaar apne zaati bhi ho sakte heN?

Lijiye meri taraf se sher,

Baatin meiN ubhar, kar zabt-e-fugaaN, le apni nazar se kaar-e-zabaaN
Dil josh meiN laa, faryaad na kar, taaseer dikhaa, taqreer na kar

(Akbar Allahabadi)

khush amde anmol!
masarrat huee apko yahaaN dekh kar.yaqeen hay keh aap aainda bhi baqaaidagii se hamare saath apni is bazm meiN shareekraheNgii.
aap anjuman meiN apne ash,aar bhi de saktii haiN.

jawaan apna, jawano! ye walwalalah rakhna
diyaa, diye se jalaane ka silsilah rakhna
najma

Post by **Anmol** » Tue May 31, 2005 11:55 pm

Shukria!

Acha to phir apne ashaar sunati huN.

Arz kia hay,

Kisi baat per to qanaa'at kare
Bashar kyooN hamesha shikaayat kare

Usey yaad rakho jo mohsin bane
Bhula do usey jo adaawat kare

(by AnmoL)

Post by **najma** » Wed Jun 01, 2005 12:00 am

bohat khoob anmol

waaah

chehroN pe aziizoN ke hay leh,r raqabat kii
apne na hoN jab apne, kya faaida rishtoN se

khawar

Post by **Hashmat Usmani** » Wed Jun 01, 2005 12:23 am

yuN to Saiyad bhii ho, Mirzaa bhii ho, AfGhaan bhii ho
tum sabhii kuchh ho bataao ki musalmaan bhii ho

'allaamah Iqbaal

Post by **najma** » Wed Jun 01, 2005 12:29 am

umeed-o-beem meiN kab tak rahegaa qaid shu,oor
karo bhi khatm ye jhagRaa bas ab, khudaa ke liye
khawar

Post by **Anmol** » Wed Jun 01, 2005 12:38 am

Dard-e-dil ke waaste peda kia insaan ko
Warna ataa'at ke liye kum na they karr-o-bayaaN

(Allama Iqbal)

Post by **Hashmat Usmani** » Wed Jun 01, 2005 12:44 am

yahaaN kotaahii-e-zauq-e-'amal hai Khud giraftaarii
jahaaN baazoo simaTte haiN, vahiiN saiyaad hotaa hai

AsGhae GoNDvii

Post by **Anmol** » Wed Jun 01, 2005 12:45 am

Khudi ko kar buland itna k har taqdeer se pehle
Khuda bande se Khud pooche, bataa teri raza kya hay?

(IQBAL)

Post by **najma** » Wed Jun 01, 2005 12:46 am

tirii raahoN meiN aaeiN gay masaaib bhi, hawadic bhi
zara daaman bacha kar in shararoN se guzar jaanaa
najma

Post by **Anmol** » Wed Jun 01, 2005 12:48 am

NahiN tera nasheman qadr-e-sultani ke guNbad per
Tu shaheen hay, basera kar pahaaRoN ki chaTaanoN meiN

(IQBAL)

Post by **Hashmat Usmani** » Wed Jun 01, 2005 12:52 am

nazar ko Khairah kartii hai chamak tahzeeb-e-Haazir kii
yeh sannaa'ii magar jhooTe nagoN kii reza_kaarii hai

'allaamah Iqbaal

Post by **najma** » Wed Jun 01, 2005 12:53 am

yehii hay shart, keh ponhcho khalaaoN meiN jab tum
watan ki khaak se apna muaamlah rakhnaa
najma