کسی سے سچ نہ سنو اور سچ نہ کہنے دو
Posted: Sun Aug 21, 2022 6:09 am
قارئین کرام آداب عرض ہیں ایک تازہ کلام پیشِ خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔
فضا میں پھیلا ہوا اضطراب رہنے دو
جو سہہ رہے ہیں ستم روز روز سہنے دو
یہ طے ہوا ہے جیے گا وہی ہے جس میں دم
بقا کی جنگ میں بہتا ہے خون بہنے دو
تمہیں تو مجھ سے ہے رسماً سدا کی ہمدردی
حضور مجھ کو اس احساں سے دور رہنے دو
زباں پہ روک لگانے کا وقت آ پہنچا
کسی سے سچ نہ سنو اور سچ نہ کہنے دو
جو بیٹیوں کو کرو تم وداع تو سن لو
انہیں محبت و اخلاق کے بھی گہنے دو
کہاں تلک مری لوگو زبان پکڑو گے
نہ روکو آج مجھے کھل کے بات کہنے دو
بہت کٹھن ہے مسلسل یہ زیست کا صحرا
سفر میں آس کے قائم سراب رہنے دو
انا کی تم نے اٹھائی ہے خود میں جو دیوار
خیالؔ آج یہ دیوار خود میں ڈھہنے دو
۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ