سدا ناؤ کاغذ کی چلتی نہیں
Posted: Fri Aug 05, 2022 5:37 pm
قارئین کرام ایک تازہ کلام پیش خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔
محبت کی چنگاری جلتی نہیں
جو دل میں محبت مچلتی نہیں
ہیں سب ایک ناؤ میں دیکھو سوار
سدا ناؤ کاغذ کی چلتی نہیں
میں سچ بولتا ہوں تو لڑتے ہیں لوگ
زباں آپ کی سچ اگلتی نہیں
جتاتے ہیں احسان وہ رات دن
کہ جب ان کی ہے دال گلتی نہیں
ہوا اس قدر دل ہمارا اچاٹ
کوئی آرزو اب مچلتی نہیں
جو دنیا کی چاہت کو لے کر گیا
تو پھر آخرت ہے سنبھلتی نہیں
جوانی کو فکروں نے بوڑھا کیا
وگرنہ جوانی یوں ڈھلتی نہیں
مصیبت کو پیچھے لگا تو لیا
مصیبت مصیبت ہے ٹلتی نہیں
ہے دل میں محبت اگر آپ کے
تو سینے میں نفرت یوں پلتی نہیں
خیالؔ آپ خود کو بدل ڈالیے
یہ دنیا اگر ہے بدلتی نہیں
۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ