aek aur saadah si ghazal. Abdullah Nazir.
Posted: Sat Apr 22, 2006 3:20 pm
MuHtaramaat o MuHtarameen
aHbaab-e-sukhan
PurkhulooS Tasleemaat, :rose
Apni aek aur taazah tareen saadah si ghazal pesh karne ki jasaarat karrahaa hooN. Umeed ke apni aaraa se navaazkar mujhe shukriyah adaa karne kaa mauqaA denge.
GHAZAL: RaAna Jamali
======
shaam-e-gham jalvah dikhaakar chal diye
mujhko deewaanah banaakar chal diye
Aaye aur nazreN churaakar chal diye
Dil ki bunyaadeN hilaakar chal diye
maiN ne izhaar-e-tamanna jab kiyaa
sharm se wo sar jhukaakar chal diye
VaSl ki shab maiN ne aisaa kyaa kiyaa
Be-sabab kiyuN moNh banaakar chal diye
Zulf-e-pechaaN ko maiN suljhaataa kahaaN
Wo mire chakke chuRaakar chal diye
maiN bhari meHfil meiN tanhaa hougayaa
jaane kiyuN mujhko bulaakar chal diye
Heelah-jooyi unki fiTraT meiN jo thii
Aas wo kal ki dilaakar chal diye
Lazzat-e-deedaar bhi baaqi nahiN
shamA-e-ulfat ko bujhaakar chal diye
jin se Nazir ko thii ummeed-e-wafaa
wo bhi uskaa jee jalaakar chal diye
=======
Aapka MukhliS,
Nazir.