• "nah is jahaaN kee Khabar hai nah us jahaaN kee Khabar!

Posted: **Sat Jul 09, 2005 5:11 am**

yaaraan-e-bazm: aadaab!

teen haftoN ke ba'd aaj HaaZ^ir ho rahaa hooN. yeh waqt :suffer: meN guZraa aur internet tak meree rasaayee :ba-qadr-e-baadaam: hee rahee. is dauraan meN do GhazaleN ho gayeeN aur ek maZ^moon bh`ee likh`aa. ek Ghazal aaj pesh-e-Khidmat hai. maZ^moon kee nok-palak durust kar looN to jald hee us ko bh`ee pesh karooN gaa. inshaa-Allah!

yeh Ghazal Qalandar Bakhsh "Jur,at" kee t^araH meN hai: "nah is jahaaN kee Khabar hai nah us jahaaN kee Khabar!" guZaarish hai keh apnee raaYe se nawaazeN. mazeed yeh keh maqt^e' ko ziyaadah qaabil-e-e'tinaa nah jaaneN. English meN is t^arz-e-teHreer ko :tongue in cheek: kehte haiN! ya'nee yeh maqt^a' sanjeedagee se naheeN kahaa gayaa hai! Allah, Allah, Khair SalaaH!

aap ke ta,accuraat kaa intiz^aar rahe gaa. shukriyah peshagee HaaZ^ir hai!

Sarwar A. Raz "Sarwar"
-------------------------------------------
GHAZAL:

jigar kee, dil kee, nigaahoN kee, jism-o-jaaN kee Khabar!
rakh`ooN to rakkh`ooN maiN aaKhir kahaaN kahaaN kee Khabar?

qafas-naSeeb hooN, kyoN kar ho aashiyaaN kee Khabar?
bh`alaa zameeN ko bh`ee hotee hai aasmaaN kee Khabar?

maiN apne paas se guZraa to yooN huwaa meHsoos
keh kaarwaaN ko naheeN gard-e-kaarwaaN kee Khabar!

junooN ne waaqif-e-Islam kar diyaa warnah
kise th`ee furSat-e-sajdah, kise aZaaN kee Khabar!

Khudaa ko bh`ool gayaa maiN pa,Ye Khud-aagaahee
:nah is jahaaN kee Khabar hai nah us jahaaN kee Khabar: (Jur,at)

jo ho sake to kaho t^oor-e-i'shq-saamaaN kee
jahaaN peh hosh uRe th`e mire, wahaaN kee Khabar!

KhizaaN hai gulshan-e-hastee meN Khud se meHroomee
bahaar kyaa hai? isee qaryah-e-amaaN kee Khabar!

yeh sar-bureedah tamanaa, yeh Khoon Khoon umeed!
Sadaa-ba-SeHraa hai ik, ek imtiHaaN kee Khabar!

woh saa,a't-e-guZaraaN ho keh lamHah-e-maujood
tamaam Haalat-e-yak-u'mr-e-raa,igaaN kee Khabar!

jise bh`ee dekh`iYe th`aa meHv-e-bazm-aaraayee
kisee ko kab rahee "Sarwar" se nuktah-daaN kee Khabar? (al-a'yaaZ^a" bi.llaah!)
---------------------------------------
Sarwar A. Raz "Sarwar"

Posted: **Sat Jul 09, 2005 2:31 pm**

MuHtarami
Sarwar A. Raz Saahib,

Purkhuloos Tasleemaat,

Aapki ghazal paRhakar bahut luTf andouz houaa. Saare ke saare ashAaar hasb-e-maAmool bahut hii dilkash heiN.

MatleA per souch meiN paRgayaa ke "kahaaN kahaaN kii khabar" theek hei yaa kis kis kii khabar hounaa chaahiye. Aakhir-e-kaar aap kaa misraA hii bilkul saheeh maAloom houaa.

Khaksaar kii daad aur mubaarakbaad Hazir hei.

Aapka Mukhlis,

Nazir.

Posted: **Sun Jul 10, 2005 5:08 am**

mukarramee Nazir SaaHeb: aadaab!

Zarrah-nawaazee ke liYe mamnoon hooN. Ghazal aap ko pasand aa gayee to meree Khush-qismatee hai! mujh` ko yeh jaan kar Khushee huyee keh aap ne mat^le' meN :kahaaN kahaaN kee Khabar: kee Salaabat se ittifaaq kiyaa. shukriyah!

"Taar-e-Anfaas-e-Ghazal: ke ijraa par mubaarakbaad qubool keejiYe!

Sarwar A. Raz "Sarwar"

Posted: **Sun Jul 10, 2005 5:13 am**

Sara SaaHebah: aadaab!

apnee Ghazal par aap kee mufaSSil raaYe dekh`ee aur dil shaad huwaa. meree bad-qismatee yeh hai keh log meree GhazaloN par tanqeed-o-tabsireh se gureZ karte haiN! aap heee kuch` likh` diyaa kareN! Ghazal kee paZeeraayee kaa dilee shukriyah!

kabh`ee furSat ho to www.ebazm.com par jaa kar ek dost ke haath`oN meree Ghazal kaa tamaashah dekh`iYe gaa! woh jo yahaaN kehte haiN naa keh :satisfaction guaranteed:? b.ilkul wohee mazaa mile gaa!

Sarwar A. Raz "Sarwar"

"nah is jahaaN kee Khabar hai nah us jahaaN kee Khabar!

"nah is jahaaN kee Khabar hai nah us jahaaN kee Khabar!

Bahut khoob