ہونٹ اور ناک کے مابین بنائیں مونچھیں
Posted: Sat Mar 25, 2023 9:23 am
قارئین کرام مونچھوں کے ساتھ فی البدیہہ تازہ خیالؔ حاضر ہے ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔
جب ہُوا بیٹا تو اوپر کو اُٹھائیں مونچھیں
پیدا بٹیا جو ہوئی نیچے گرائیں مونچھیں
تُو نے جب زلف کی مانند بڑھائیں مونچھیں
پھر کسی اور کی ہم کو نہیں بھائیں مونچھیں
شوق مونچھوں کا تھا بچپن میں تو ہم نے اکثر
ہونٹ اور ناک کے مابین بنائیں مونچھیں
نت نئے تیل لگائے کہ مسیں پھوٹیں کچھ
کر لیے سارے جتن پھر بھی نہ آئیں مونچھیں
مونچھوں میں نام کماکر ہیں گئے نتّھو لعل
کیا کسی اور نے ان جیسی اگائیں مونچھیں
کیسے چنچل سی حسینہ نے شرارت کر کے
اپنی زلفوں سے ہیں چہرے پہ سجائیں مونچھیں
رعب جھاڑا ہے سدا اپنے ہر اک دشمن پر
اپنے دشمن کو اکڑ کر ہیں دکھائیں مونچھیں
ہم نے ہر حال میں مونچھوں کا کیا ہے احساس
مار کھائی مگر اپنی نہ کٹائیں مونچھیں
پِس کے حالات کی چکی میں خیالؔ آخر ہم
ہو گئے ٹکلے مگر اپنی بچائیں مونچھیں
۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ